Londonning «Arsenal» klubi «Atletiko» hujumchisi Xulian Alvaresni o‘z safiga qo‘shib olish niyatidan qaytmayapti.

Sport nashri ma’lumotiga ko‘ra, «kanonirlar» madridliklarga taxminan 80 million yevro hamda hujumchi Viktor Dyokereshni taklif qilgan.

Shuningdek, «Arsenal» Alvaresning o‘ziga yiliga 25 million yevro atrofida maosh to‘lashga tayyor. Bu argentinalik futbolchining hozirgi daromadidan qariyb ikki baravar ko‘p.

Biroq transfer taqdiri ko‘p jihatdan Alvaresning qaroriga bog‘liq. Hujumchi Angliyaga qaytishga unchalik qiziqish bildirmayapti. U avval «Manchester Siti» safida Premyer-ligada to‘p surgan.

Alvares uchun asosiy da’vogar sifatida uzoq vaqt «Barselona» ko‘rsatib kelingan. Ammo «Atletiko» o‘zining yetakchi futbolchisini to‘g‘ridan-to‘g‘ri raqobatchilaridan biriga sotishni istamayotgani aytilmoqda.

Shu tariqa, «Arsenal»ning moliyaviy jihatdan jozibador taklifiga qaramay, yakuniy qaror Alvaresning o‘ziga bog‘liq bo‘lib turibdi.