Ироқ чемпионатида ҳақиқий «гол машинаси»га айланган Шерзод Темиров узоқ танаффусдан сўнг Ўзбекистон миллий терма жамоаси йиғинига жалб қилинди. «Эрбил» ҳужумчиси бўлажак баҳслар ва ўз фаолиятидаги қизиқарли жиҳатлар ҳақида тўхталиб ўтди.

«Мураббийга энг яхши жиҳатларимни кўрсатаман»

— Терма жамоага қайтганимдан хурсандман. Олдимизда Жаҳон чемпионати турибди ва мен машғулотларда ўз имкониятларимни тўлиқ намойиш этиб, мураббийлар штабида ижобий таассурот қолдиришга ҳаракат қиламан. Мақсадим — асосий таркибдан мустаҳкам ўрин олиш.

Ироқдаги зафарли юриш ва тўпурарлик пойгаси

Шерзод айни дамда Ироқ чемпионатида феноменал натижа кўрсатмоқда. Унинг ҳисобида 14 та ўйинда 20 та гол бор!

— Ироқда иккинчи давра энди бошланди. Ҳозирча бирор нарса дейиш қийин, чунки таъқибчилар бор. Ироқ лигасининг рейтинги Суперлигамиздан юқори бўлиши мумкин, аммо икки чемпионат даражасини таққослашни журналистларга қолдирган маъқул.

Келажак ва Суперлигага қайтиш эҳтимоли

— Гонконг биринчилигида ўйнаган вақтимда чақирилмаганим — мураббийларнинг қарори. Менинг вазифам — чақирув олганда майдонда бор кучимни бериш. Ёзда Ўзбекистонга қайтиш борасида таклифлар бор. Айни дамда агентим Нидерландияда, у билан кўришгач, кейинги режаларни аниқлаб оламиз.

Маълумот учун:

27 ёшли ҳужумчи Ироқ тўпурарлар пойгасида энг яқин таъқибчисини 7 та голга ортда қолдирмоқда.

Эслатиб ўтамиз, вакилларимиз FIFA Series доирасида Тошкентда иккита муҳим баҳс ўтказишади:

• 27 март: Ўзбекистон — Габон

• 30 март: Ўзбекистон — Венесуэла