Дортмунднинг «Боруссия» клуби марказий ҳимоячиси Нико Шлоттербек клуб билан шартномасини узайтириш арафасида турибди. Бу ҳақда Bild нашри хабар бермоқда.
Манбанинг маълум қилишича, бу узоқ ва чўзилган жараён бўлди, бироқ ҳозирда 26 ёшли футболчи билан музокаралар якунига етмоқда ва келишувга деярли эришилган.
Шлоттербек «Сигнал Идуна Парк»даги фаолиятини 2031 йилгача узайтиради ва йилига тахминан 14 миллион евро маош олади. Янги шартномада 60 миллион евро миқдоридаги товон пули ҳақидаги банд ҳам ўрин олади ва у 2027 йилнинг ёзидан кучга киради. Келишувга якуний нуқта халқаро танаффусдан сўнг қўйилиши кутилмоқда.
Сўнгги вақтларда Шлоттербекнинг хизматларига Мадриднинг «Реал» клуби фаол қизиқиш билдираётган эди.
