Бразилия терма жамоаси бош мураббийи Карло Анчелотти бўлажак Жаҳон чемпионати олдидан жамоанинг заиф томонлари ҳақидаги саволга жавоб берди.
«Пентакампеонлар» устози ҳозирги вақтда ҳимоя қанотларидаги футболчилар танлови кўнгилдагидек эмаслигини тан олди.
«Ҳозир Бразилияда илгари ҳеч қачон муаммо бўлмаган позицияда камчилик сезилмоқда — бу қанот ҳимоячилари. Ўтмишда бу ерда Марсело, Кафу кабилар бор эди. Ҳозирда эса танқислик кузатиляпти», — дея италиялик мутахассиснинг сўзларидан иқтибос келтирмоқда Brasil Football.
Карло Анчелотти ўтган йил ёзининг бошида Бразилия миллий терма жамоаси бошқарувини қўлга олган эди. Бунгача мураббий Мадриднинг «Реал» клубида фаолият юритган.
