“Манчестер Юнайтед”нинг бразилиялик ярим ҳимоячиси Каземиро фаолиятини Саудия Арабистони чемпионатида давом эттириши мумкин. 34 ёшли футболчига “Ал-Иттиҳод” клуби жиддий қизиқиш билдирмоқда. Бу ҳақда ESPN нашри хабар берди.

Манбанинг таъкидлашича, ушбу трансфернинг амалга ошиши жамоанинг бошқа бир бразилиялик аъзоси — Фабиньонинг келажагига боғлиқ. Фабиньонинг амалдаги шартномаси ёзда якунига етади ва агар у жамоани тарк этса, “Ал-Иттиҳод” унинг ўрнини Каземиро билан тўлдиришни режалаштирган.

Маълумот учун, Каземиро жорий мавсум “манкунианликлар” сафида барча турнирлар доирасида жами 36 та ўйинда майдонга тушиб, ўз ҳисобига 2 та гол урди ва 2 та голли узатма ёздириб қўйган. Тажрибали ярим ҳимоячининг “Манчестер Юнайтед” билан амалдаги келишуви июнь ойи охиригача амал қилади. Катта эҳтимол билан томонлар ҳамкорликни узайтирмайди ва футболчи эркин агент сифатида клубдан кетади.