“Manchester Yunayted”ning braziliyalik yarim himoyachisi Kazemiro faoliyatini Saudiya Arabistoni chempionatida davom ettirishi mumkin. 34 yoshli futbolchiga “Al-Ittihod” klubi jiddiy qiziqish bildirmoqda. Bu haqda ESPN nashri xabar berdi.

Manbaning ta’kidlashicha, ushbu transferning amalga oshishi jamoaning boshqa bir braziliyalik a’zosi — Fabinyoning kelajagiga bog‘liq. Fabinyoning amaldagi shartnomasi yozda yakuniga yetadi va agar u jamoani tark etsa, “Al-Ittihod” uning o‘rnini Kazemiro bilan to‘ldirishni rejalashtirgan.

Ma’lumot uchun, Kazemiro joriy mavsum “mankunianliklar” safida barcha turnirlar doirasida jami 36 ta o‘yinda maydonga tushib, o‘z hisobiga 2 ta gol urdi va 2 ta golli uzatma yozdirib qo‘ygan. Tajribali yarim himoyachining “Manchester Yunayted” bilan amaldagi kelishuvi iyun oyi oxirigacha amal qiladi. Katta ehtimol bilan tomonlar hamkorlikni uzaytirmaydi va futbolchi erkin agent sifatida klubdan ketadi.