«Реал Мадрид» юлдузи Килиан Мбаппе ва клуб президенти Флорентино Перес ўртасида кечган телефон суҳбати тафсилотлари маълум бўлди. L’Équipe нашри тарқатган хабарга кўра, франциялик ҳужумчи март ойи бошида бўлиб ўтган ушбу суҳбатда «қироллик клуби» шифокорлари хизматидан воз кечишини маълум қилган.

Бунга асосий сабаб сифатида Мбаппенинг клуб тиббий штабига бўлган ишончи йўқолгани кўрсатилмоқда. Аввалроқ ОАВда мадридликлар шифокорлари футболчининг чап тиззасидаги жароҳатни текшириш ўрнига, хатолик билан соғлом бўлган ўнг тиззасини МРТ қилгани ҳақида шов-шувли хабарлар тарқалган эди. Гарчи Мбаппенинг ўзи яқинда берган интервьюсида «нотўғри тизза» ҳақидаги гапларни рад этган бўлса-да, унинг клуб тиббий ходимларидан норози экани ва бундан буён "ПСЖ"даги собиқ шифокори Кристоф Бодо назоратида даволанишни истаётгани айтилмоқда.

Мбаппе Испания чемпионатининг жорий мавсумида 24 та ўйинда майдонга тушиб, 23 та гол ва 4 та голли узатмани амалга оширди.