«Пари Сен-Жермен» ҳужумчиси Гонсалу Рамуш Англияга кўчиб ўтиши мумкин.
Португалиялик футболчига «Манчестер Юнайтед» қизиқиш билдирмоқда, шунингдек, даъвогарлар қаторида «Ньюкасл» ва «Челси» клублари ҳам тилга олинган. Инсайдер Экрем Конурнинг маълумотларига кўра, 24 ёшли футболчининг трансфер учун очиқлиги ҳақида «Тоттенхэм» ҳам хабардор қилинган. Ҳужумчи асосий таркибда мунтазам майдонга тушишни истагани сабабли, келаётган ёзда «ПСЖ»ни тарк этишга тайёр.
Transfermarkt порталининг баҳолашига кўра, Гонсалу Рамушнинг бозор қиймати 35 млн еврони ташкил этади. Жорий мавсумда футболчи Луис Энрике жамоаси сафида 38 та ўйинда майдонга тушиб, 11 та гол урди ва иккита самарали узатмани амалга оширди.
