Мадриднинг «Реал» клуби ярим ҳимоячиси Федерико Вальверде 2020 йилги Испания Суперкубоги финалида «Атлетико»га қарши кечган баҳсда Альваро Моратага нисбатан ишлатган «подкат»ини ёдга олди.
Уругвайлик футболчи 115-дақиқада «Реал» дарвозаси томон яккама-якка чиқиб бораётган рақибини орқадан йиқитиб, тўғридан-тўғри қизил карточка олган эди. Якунда «қаймоқранглилар» пенальтилар сериясида ғалаба қозониб, кубокка эга чиқишган.
«Бу болалар учун нотўғри ўрнак. Аммо ўша лаҳзада жамоа учун таваккал қилишим кераклигини ҳис қилганман. Майдондан четлатилишимни билардим. Ўшанда миямга бошқа фикр келмаган, лекин қилишим керак бўлган ишни қилганман.
Мен фақат «Реал» ғалаба қозониши кераклиги ҳақида ўйлагандим. Мен жанубий америкаликман, биз эҳтиросга тўламиз», — деди Вальверде Terapia Picante нашрига берган интервьюсида.
