Таниқли собиқ мураббий Фабио Капеллонинг фикрича, Женнаро Гаттузо муваффақиятсизликка қарамай, Италия терма жамоасидаги фаолиятини давом эттириши керак.

Италияликлар кетма-кет учинчи бор Жаҳон чемпионатини ўтказиб юборадиган бўлишди. ЖЧ-2026 йўлланмаси учун кечган ўтиш ўйинларининг финалида «Скуадра Адзурра» Босния ва Герцеговина терма жамоасига имкониятни бой берди.

«Мен мураббий борасида бирор қарор қабул қилишдан олдин кейинги икки ўйин натижасини кутган бўлардим. У Лучано Спаллетти кетганидан сўнг, саралаш кампанияси давом этаётган бир пайтда лавозимга келганини унутмаслик лозим. Менимча, Гаттузо билан терма жамоа яна ўз мақсади ва характерини топди. Юз берган воқеа жуда ачинарли, аммо биз биргина футболчининг оддий хатоси учун жазоландик», — деди Капелло Sky Sport билан суҳбатда.

Эслатиб ўтамиз, финал баҳсининг 41-дақиқасидаёқ италияликлар бир киши кам бўлиб қолишган эди — Алессандро Бастони тўғридан-тўғри қизил карточка олиб, майдонни тарк этган.