Taniqli sobiq murabbiy Fabio Kapelloning fikricha, Jennaro Gattuzo muvaffaqiyatsizlikka qaramay, Italiya terma jamoasidagi faoliyatini davom ettirishi kerak.

Italiyaliklar ketma-ket uchinchi bor Jahon chempionatini o‘tkazib yuboradigan bo‘lishdi. JCH-2026 yo‘llanmasi uchun kechgan o‘tish o‘yinlarining finalida «Skuadra Adzurra» Bosniya va Gersegovina terma jamoasiga imkoniyatni boy berdi.

«Men murabbiy borasida biror qaror qabul qilishdan oldin keyingi ikki o‘yin natijasini kutgan bo‘lardim. U Luchano Spalletti ketganidan so‘ng, saralash kampaniyasi davom etayotgan bir paytda lavozimga kelganini unutmaslik lozim. Menimcha, Gattuzo bilan terma jamoa yana o‘z maqsadi va xarakterini topdi. Yuz bergan voqea juda achinarli, ammo biz birgina futbolchining oddiy xatosi uchun jazolandik», — dedi Kapello Sky Sport bilan suhbatda.

Eslatib o‘tamiz, final bahsining 41-daqiqasidayoq italiyaliklar bir kishi kam bo‘lib qolishgan edi — Alessandro Bastoni to‘g‘ridan-to‘g‘ri qizil kartochka olib, maydonni tark etgan.