Италия футболи афсонаси, собиқ ҳимоячи Паоло Мальдини Италия терма жамоасининг яқиндаги муваффақиятсизлиги ҳақида ўз фикрлари билан ўртоқлашди.

Италияликлар қаторасига учинчи бор Жаҳон чемпионатидан қуруқ қолишди. Мундиал йўлланмаси учун кечган ҳал қилувчи баҳсда «скуадра адзурра» пенальтилар сериясида Босния ва Герцеговина терма жамоасига имкониятни бой берди.

«Италия терма жамоаси либосини кийганингда, қалбингда фахр ва тарихий масъулиятни ҳис қиласан. Бизнинг терма жамоамиз футбол оламидаги энг буюк жамоалардан бири. Битта Жаҳон чемпионатини ўтказиб юбориш — бу хавфли сигнал, иккитаси — инқироз, учтаси эса — буткул муваффақиятсизлик. Менинг давримда истеъдод қадрланарди, лекин характер биринчи ўринда эди. Интизом, меҳнатсеварлик, миллий рангларга бўлган ҳурмат — буларсиз иложи йўқ. Бугунги кунда мен бундай муносабатни кўрмаяпман. Терма жамоа либоси учун бор-будини беришга тайёр футболчиларни кўрмаяпман. Босниядан учралган мағлубият — бу шунчаки омадсиз натижа эмас, балки ички тизимдаги чуқур муаммолар ифодасидир. Ўзлигини, ғурурини ва масъулиятини йўқотган Италия — бу энди ҳақиқий Италия эмас», — дея «Милан» афсонасининг сўзларини келтиради Италия ОАВлари.

Маълумот учун, Паоло Мальдини 1988 йилдан 2002 йилгача миллий терма жамоа шарафини ҳимоя қилган.