"Ливерпуль" собиқ футболчиси Джон Барнс испаниялик Хаби Алонсонинг "қизиллар" бош мураббийи этиб тайинланиши мумкинлиги ҳақидаги хабарларга ўз муносабатини билдирди.
"Алонсонинг "Ливерпуль"га келиши ҳақидаги хабарлар нега бунчалик шов-шувга сабаб бўлаётганини тушунаман. Хаби — жамоа мухлисларининг ёқимтойи. Лекин у Мадридда муваффақиятсизликка учрамадими? Алонсо яхши мураббий эканлигини инкор этмайман, аммо у қониқарсиз натижалар туфайли истеъфога чиқарилган эди-ку. Мен Арне Слотнинг қолишини хоҳлардим", — дея собиқ ўйинчининг сўзларини келтиради Liverpool Echo.
Ҳозирда Англия Премьер-лигасида "Ливерпуль" бешинчи ўринни эгаллаб турибди. Чемпионлар Лигасида эса жамоа чорак финалга йўл олган ва у ерда Франциянинг "ПСЖ" клуби билан тўқнаш келади.
