"Liverpul" sobiq futbolchisi Djon Barns ispaniyalik Xabi Alonsoning "qizillar" bosh murabbiyi etib tayinlanishi mumkinligi haqidagi xabarlarga o‘z munosabatini bildirdi.
"Alonsoning "Liverpul"ga kelishi haqidagi xabarlar nega bunchalik shov-shuvga sabab bo‘layotganini tushunaman. Xabi — jamoa muxlislarining yoqimtoyi. Lekin u Madridda muvaffaqiyatsizlikka uchramadimi? Alonso yaxshi murabbiy ekanligini inkor etmayman, ammo u qoniqarsiz natijalar tufayli iste’foga chiqarilgan edi-ku. Men Arne Slotning qolishini xohlardim", — deya sobiq o‘yinchining so‘zlarini keltiradi Liverpool Echo.
Hozirda Angliya Premyer-ligasida "Liverpul" beshinchi o‘rinni egallab turibdi. Chempionlar Ligasida esa jamoa chorak finalga yo‘l olgan va u yerda Fransiyaning "PSJ" klubi bilan to‘qnash keladi.
