«Челси» ярим ҳимоячиси Мойсес Кайседо Мадриднинг «Реал» клубига эҳтимолий ўтиши ҳақида яна бир бор фикр билдирди.

Эквадорлик футболчи, «кўклар»нинг бошқа кўплаб юлдузлари каби, «қироллик клуби» билан боғланмоқда.

«Футболда нима бўлишини ҳеч қачон билмайсиз. Менинг «Челси» билан шартномам бор, бошқа клубга ўтиш ҳақида ўйламаганман, лекин ҳеч қачон аниқ бир гап айтиб бўлмайди. Ягона истагим — ўйиндан завқ олиш. Кўрамиз, келажакда нималар содир бўларкин», — дея Кайседонинг сўзларини журналист Эдуардо Бургос келтирмоқда.

Transfermarkt портали 24 ёшли ярим ҳимоячининг бозор қийматини 110 миллион еврога баҳоламоқда. Футболчининг клуб билан шартномаси 2031 йилгача мўлжалланган.