Рио-де-Жанейродаги Олимпия боғида жойлашган велодромда 8 апрель, чоршанба тонгида ёнғин содир бўлди. Бу ҳақда Reuters нашри хабар берди. Манбага кўра, ёнғин ўчирувчиларнинг тезкор ҳаракати туфайли олов тезда назоратга олинган ва мажмуанинг бошқа қисмларига шикаст етмаган. Шунингдек, ҳодиса оқибатида ҳеч ким жабрланмаган.

Штат ҳарбий ёнғин хизматининг маълумот беришича, чақирув соат 04:17 да келиб тушган. Алангани ўчиришга 80 нафар ўт ўчирувчи ва 20 та махсус техника жалб этилган.

2016-йилги Олимпиада ўйинлари учун қурилган ушбу велодром шаҳар маъмурияти томонидан бошқарилади. Мажмуа ҳудудида Олимпия музейи ҳам жойлашган бўлиб, унда ўйинлар тарихига оид ноёб экспонатлар, жумладан, Олимпия машъаласи ва медаллар сақланади.

Полковник Фабио Контрейраснинг CNN Brasil телеканалига берган интервьюсида таъкидлашича, ўт ўчирувчилар музейдаги тарихий осори-атиқаларни сақлаб қолиш учун бино ичида ва ташқарисида олов билан жиддий кураш олиб боришган.

Рио-де-Жанейро мери Эдуардо Кавалиере журналистларга берган баёнотида, ёнғин велодромнинг брезент тўшамали шифтига етиб борганини маълум қилди. Бироқ мутахассислар зарар кўламини ўрганиб чиқиб, велодром ва Олимпия музейи ёнғиндан жиддий зарар кўрмаганини тасдиқлашган.

Маълумот учун, ушбу велодром Бразилиядаги энг йирик ва нуфузли велоспорт маркази ҳисобланади. Шунингдек, у оғир атлетика ва велоспорт бўйича миллий терма жамоалар учун асосий машғулот базаси бўлиб хизмат қилади. Эътиборлиси, 2017-йилда ҳам бинонинг том қисмида икки марта ёнғин чиқиб, мажмуага унча катта бўлмаган зарар етган эди.