Мадриднинг «Реал» клуби собиқ чап қанот ҳимоячиси Марсело Криштиану Роналду билан бирга ўйнаган йилларини вақти-вақти билан ёдга олиб туради.
Бразилиялик футболчи 2007 йилдан 2022 йилгача «қаймоқранглилар» шарафини ҳимоя қилган бўлса, португалиялик ҳужумчи 2009 йилдан 2018 йилгача «қироллик клуби»да тўп сурган.
«Криштиану мени ўзининг барқарорлиги билан ҳайратда қолдирарди. Буни қандай ифодалаш мумкинлигини билмайман-у, лекин у ҳар йили бир хил самарадорликни сақлаб қоларди — бир мавсумнинг ўзида фақат чемпионатда 30–40 тадан гол урарди. Унинг учун бу нормал ҳолат эди. Ҳайратланарли», — дея собиқ латералнинг сўзларини келтиради Al Nassr Zone.
Марсело 2025 йилнинг бошида фаолиятини якунлаган эди. Февраль ойида 41 ёшини қаршилаган Роналду эса Саудия Арабистонининг «Ан-Наср» клубида фаолиятини давом эттирмоқда.
