Лондоннинг «Тоттенхэм» клубининг бир нечта муҳим футболчилари ёзги трансфер ойнасида жамоадан кетиш имкониятини кўриб чиқмоқда.

The Touchline нашрига маълум бўлишича, ўйинчиларнинг клубдан кетиш ҳақида ўйлаётганига жамоанинг Чемпионшипга тушиб кетиш хавфи остида тургани сабаб бўлмоқда. Манба берган маълумотларга кўра, Хави Симонс, Жеймс Мэддисон ва Кудус потенциал янги клуб вариантларини ўрганаётганлар қаторига киради.

Аввалроқ, «Вест Хэм» АПЛнинг 32-турида «Вулверхэмптон»ни тор-мор этиб, «Тоттенхэм»ни ортда қолдирган ҳолда хавфли ҳудудни тарк этган эди. Эндиликда «шпорлар» турнир жадвалида 18-ўринга тушиб кетишди ва хавфсиз зонадан икки очкога ортда қолмоқдалар, бироқ уларда битта захира ўйини мавжуд.

12 апрель куни Роберто Де Дзерби шогирдлари сафарда «Сандерленд» билан тўқнаш келишади. Учрашув Тошкент вақти билан 18:00 да бошланади.