Мадриднинг «Реал» клуби президенти Флорентино Перес Чемпионлар лигаси чорак финалида «Бавария»га бой берилган баҳсдан сўнг футболчиларни қўллаб-қувватлади.
«Қаймоқранглилар» Мюнхендаги учрашувда ишни қўшимча бўлимларгача олиб боришларига оз қолган эди, бироқ баҳс якунида бир киши кам бўлиб қолишгач, иккита гол ўтказиб юборишди ва мусобақа билан хайрлашишди — 3:4 (умумий ҳисоб — 4:6). Хабар берилганидек, учрашув якунлангач, Перес жамоа кийиниш хонасига йўл олди. El Chiringuito нашрининг маълумотларига кўра, клуб раҳбари аламли мағлубиятдан сўнг ҳар бир футболчининг олдига бориб, уларни шахсан қўллаб-қувватлаган. Иш фақат умумий нутқ билан чекланиб қолмаган.
«Реал» жорий мавсумни совринларсиз якунлаш хавфи остида турибди: Ла Лигада мадридликлар пешқадам «Барселона»дан тўққиз очко ортда қолмоқда, Испания Кубогидан эса аллақачон чиқиб кетишган.
