Madridning «Real» klubi prezidenti Florentino Peres Chempionlar ligasi chorak finalida «Bavariya»ga boy berilgan bahsdan so‘ng futbolchilarni qo‘llab-quvvatladi.
«Qaymoqranglilar» Myunxendagi uchrashuvda ishni qo‘shimcha bo‘limlargacha olib borishlariga oz qolgan edi, biroq bahs yakunida bir kishi kam bo‘lib qolishgach, ikkita gol o‘tkazib yuborishdi va musobaqa bilan xayrlashishdi — 3:4 (umumiy hisob — 4:6). Xabar berilganidek, uchrashuv yakunlangach, Peres jamoa kiyinish xonasiga yo‘l oldi. El Chiringuito nashrining ma’lumotlariga ko‘ra, klub rahbari alamli mag‘lubiyatdan so‘ng har bir futbolchining oldiga borib, ularni shaxsan qo‘llab-quvvatlagan. Ish faqat umumiy nutq bilan cheklanib qolmagan.
«Real» joriy mavsumni sovrinlarsiz yakunlash xavfi ostida turibdi: La Ligada madridliklar peshqadam «Barselona»dan to‘qqiz ochko ortda qolmoqda, Ispaniya Kubogidan esa allaqachon chiqib ketishgan.
