Нидерландия терма жамоаси бош мураббийи Рональд Куман Чемпионлар лигаси доирасидаги «Бавария» – «Реал» (4:3) учрашувида Эдуарду Камавинганинг майдондан четлатилишига муносабат билдирди.
«Агар мен мураббий бўлганимда, ҳакамдан кўра футболчидан кўпроқ ғазабланган бўлардим. Ҳакамга баҳсли қарор қабул қилиш учун асос бериб қўймаслик керак», — дея Куманнинг сўзларини келтиради Marca.
Куманнинг таъкидлашича, иккинчи сариқ карточка ҳолатида қоида бузилиши у қадар қўпол бўлмаган, бироқ футболчи ҳуштақдан кейин тўпни тўхтатиб қолгани учун вазиятни ёмонлаштирган.
Эслатиб ўтамиз, аввалроқ «Реал» бош мураббийи Альваро Арбелоа ҳакамни танқид қилиб, четлатиш ҳақидаги қарорни адолатсиз деб атаган эди.
