Англиянинг «Борнмут» клуби ҳужумчиси Эли Жуниор Крупи Мадриднинг «Реал» клуби қизиқишлари доирасига тушиб қолди.
Аввалроқ хабар берилганидек, 19 ёшли футболчини Премьер-лига грандлари диққат билан кузатиб боришмоқда, бироқ хорижий топ-клублар ҳам четда қолаётгани йўқ. Журналист Экрем Конурнинг маълумотларига кўра, истиқболли француз учун даъвогарлар қаторида «Реал» ҳам бор. «Олчалар» ҳужумчи сотувидан тахминан 63-69 миллион евро ишлаб олишни ният қилишган.
Transfermarkt портали талқинига кўра, Эли Жуниор Крупининг бозор қиймати 40 миллион еврони ташкил этади. Англия чемпионатининг жорий мавсумида футболчи 27 та ўйинда иштирок этиб, ўз ҳисобига 10 та гол ёздириб қўйишга муваффақ бўлди.
