Римнинг «Лацио» клуби дарвозабони Эдоардо Мотта «Аталанта»га қарши кечган иккинчи ярим финал баҳсининг бош қаҳрамонига айланди ва жамоасини турнир финалига олиб чиқди. Эндиликда жамоатчилик яқингача деярли ҳеч ким танимайдиган бу футболчи билан яқиндан танишишни истамоқда.
«Бергамодаги ўйинда мени ҳиссиётлар чулғаб олди, гарчи кўз ёшларимни одамлар кўришини истамаган бўлсам-да. Профессионал ўйинчи учун бардам қолиш муҳим. Кумирим ҳақида гапирадиган бўлсам, у доимо Петр Чех бўлган. Унинг ўйини менга жуда ёқарди ва онг остида унга тақлид қилишни хоҳлардим», — дея футболчининг сўзларини келтиради derbyderbyderby.it.
Италия Кубогининг финал учрашувида «Лацио» Миланнинг «Интер» клуби билан баҳс олиб боради.
