Саудия Арабистонининг Жидда шаҳрида футбол бўйича Осиё Элит Чемпионлар лигасининг финал учрашуви бўлиб ўтди. Унда мезбонларнинг «Ал-Аҳли» клуби Япониянинг «Мачида Зельвия» жамоасига қарши баҳс олиб борди.

Мазкур муҳим учрашувни Илгиз Танташев бошчилигидаги ўзбекистонлик ҳакамлар бригадаси муваффақиятли бошқариб борди.

Ўйиннинг асосий вақтида ҳар икки жамоада ҳам гол уриш учун имкониятлар юзага келган бўлса-да, ҳисоб очилмади. Ғолиб номини аниқлаш учун белгиланган қўшимча бўлимларнинг биринчисида саудияликлар ўз мақсадига эришди. 96-дақиқада Фирас ал-Бурайкан томонидан киритилган гол учрашув тақдирини ҳал қилди.

Шу тариқа, «Ал-Аҳли» ўз тарихида кетма-кет иккинчи бор қитъанинг энг нуфузли клублар турнирида ғолибликни қўлга киритди.

Осиё Элит Чемпионлар лигаси. Финал
«Ал-Аҳли» (Саудия Арабистони) — «Мачида Зельвия» (Япония) — 1:0
Гол: Ал-Бурайкан (96).