Италия А Сериясининг 34-тури доирасида кечган «Милан» ва «Ювентус» (0:0) ўртасидаги баҳсда мезбонлар мухлислари жамоа вингери Рафаэл Леауга нисбатан норозилик билдиришди.

Учрашувнинг 80-дақиқасида Леау захирага олиниб, унинг ўрнига Кристофер Нкунку майдонга тушган пайтда, «Сан-Сиро» стадионига ташриф буюрган «россонери» мухлислари португалиялик футболчини ҳуштаклар билан кузатиб қўйишди. Аввалроқ Леау 32-тур доирасидаги «Удинезе»га қарши уй учрашувидан (0:3) сўнг ҳам шундай ҳолатга дуч келган эди.

Маълумот учун, Рафаэл Леау жорий мавсумда А Серияда 9 та гол урган ҳолда жамоанинг энг яхши тўпурари бўлиб турибди. Бироқ португалиялик футболчи сўнгги олтита ўйинда фақатгина битта голли узатмани амалга оширди, холос.