«Барселона» бош мураббийи Ханс-Дитер Флик жамоа ҳимоячиси Андреас Кристенсеннинг имкониятларини юқори баҳоламоқда ва унинг клубда қолишини истайди. Бу ҳақда Mundo Deportivo нашри хабар бермоқда.
Манбага кўра, германиялик мутахассис даниялик ҳимоячининг ўйинидан мамнун, бироқ гап футболчини ҳар қандай ҳолатда ҳам олиб қолиш ҳақида кетмаяпти. Аввалроқ Кристенсен «Барселона»нинг маоши пасайтирилган ҳолда шартномани бир йилга узайтириш ҳақидаги таклифини рад этган эди.
Агар томонлар келишувга эриша олмаса, 30 ёшли футболчи шу ёзда эркин агент сифатида жамоани тарк этади. Ҳозирда унга Англия, Германия ва Италия клублари томонидан қизиқиш билдирилмоқда. Жорий мавсумда Кристенсен барча мусобақаларда 17 та ўйинда майдонга тушиб, битта гол муаллифига айланди.
