Мадриднинг «Реал» клуби вингери Родригонинг оғир жароҳатдан кейинги тикланиш жараёни тафсилотлари маълум бўлди. Эслатиб ўтамиз, бразилиялик футболчида тиззанинг олдинги хочсимон боғламлари ва мениск йиртилиши ташхиси қўйилган эди. Март ойи бошида операция қилинган футболчи 10 ойга сафдан чиққан ва ЖЧ-2026ни ўтказиб юбориши хабар қилинганди.

As нашрининг ёзишича, Родриго дастлабки ҳафталарни тўлиқ оромда ўтказган. Оёғига бандаж тақилган вақтда у футбол томоша қилиш, укулеле чалиш, домино ва PlayStation ўйинлари билан вақт ўтказган. Шунингдек, у ўз ҳолатини кундаликка қайд этиб борган. Операциядан кейинги илк кунда у: «Тўлиқ азоб, кучли оғриқ ва кўнгил айниши», деб ёзган бўлса, тўрт кундан кейин оғриқлар камайганини қайд этган.

Қизиғи шундаки, икки марта шундай жароҳатни бошдан кечирган Эдер Милитао жамоадошига руҳий далда берган. Ҳозирда Родриго «Реал» базасида ва уйидаги шахсий спорт залида машғулотларни давом эттирмоқда. Тикланиш жараёни клуб шифокорлари белгилаган муддатдан анча илгарилаб кетгани айтилмоқда.