Madridning «Real» klubi vingeri Rodrigoning og‘ir jarohatdan keyingi tiklanish jarayoni tafsilotlari ma’lum bo‘ldi. Eslatib o‘tamiz, braziliyalik futbolchida tizzaning oldingi xochsimon bog‘lamlari va menisk yirtilishi tashxisi qo‘yilgan edi. Mart oyi boshida operasiya qilingan futbolchi 10 oyga safdan chiqqan va JCH-2026ni o‘tkazib yuborishi xabar qilingandi.

As nashrining yozishicha, Rodrigo dastlabki haftalarni to‘liq oromda o‘tkazgan. Oyog‘iga bandaj taqilgan vaqtda u futbol tomosha qilish, ukulele chalish, domino va PlayStation o‘yinlari bilan vaqt o‘tkazgan. Shuningdek, u o‘z holatini kundalikka qayd etib borgan. Operasiyadan keyingi ilk kunda u: «To‘liq azob, kuchli og‘riq va ko‘ngil aynishi», deb yozgan bo‘lsa, to‘rt kundan keyin og‘riqlar kamayganini qayd etgan.

Qizig‘i shundaki, ikki marta shunday jarohatni boshdan kechirgan Eder Militao jamoadoshiga ruhiy dalda bergan. Hozirda Rodrigo «Real» bazasida va uyidagi shaxsiy sport zalida mashg‘ulotlarni davom ettirmoqda. Tiklanish jarayoni klub shifokorlari belgilagan muddatdan ancha ilgarilab ketgani aytilmoqda.