АҚШ терма жамоаси бош мураббийи Маурисио Почеттино «ПСЖ»да ишлаган вақтида Лионель Месси билан қандай ҳамкорлик қилгани ҳақида гапириб берди.
«Агар жамоангда Месси бўлса, сен уни 30 дан ошган ёшида худди «Тоттенхэм»да ишлаганимдаги 21 ёшли Сон ёки Кейн каби прессинг қилишга мажбурлай олмайсан. Сен Мессига: «Бор, прессинг қил», деб айта олмайсан. Бу шунчаки реалликдан йироқ нарса», — деди Почеттино Гарри Невиллнинг Stick to Football подкастида.
Аргентиналик мутахассис «ПСЖ»да 2021 йилнинг январидан 2022 йилнинг июлига қадар фаолият юритган. Унинг қўл остида парижликлар Франция чемпиони, мамлакат Кубоги ва Суперкубоги соҳибига айланишган.
Лионель Месси «ПСЖ» шарафини 2021 йилнинг августидан 2023 йилнинг июлигача ҳимоя қилди. Бу вақт ичида аргентиналик ҳужумчи барча мусобақаларда 75 та ўйин ўтказиб, 32 та гол урди ва 35 та голли узатмани амалга оширди. Клуб билан биргаликда у икки марта Франция чемпиони ва бир бор мамлакат Суперкубогини қўлга киритди.
