AQSH terma jamoasi bosh murabbiyi Maurisio Pochettino «PSJ»da ishlagan vaqtida Lionel Messi bilan qanday hamkorlik qilgani haqida gapirib berdi.
«Agar jamoangda Messi bo‘lsa, sen uni 30 dan oshgan yoshida xuddi «Tottenxem»da ishlaganimdagi 21 yoshli Son yoki Keyn kabi pressing qilishga majburlay olmaysan. Sen Messiga: «Bor, pressing qil», deb ayta olmaysan. Bu shunchaki reallikdan yiroq narsa», — dedi Pochettino Garri Nevillning Stick to Football podkastida.
Argentinalik mutaxassis «PSJ»da 2021 yilning yanvaridan 2022 yilning iyuliga qadar faoliyat yuritgan. Uning qo‘l ostida parijliklar Fransiya chempioni, mamlakat Kubogi va Superkubogi sohibiga aylanishgan.
Lionel Messi «PSJ» sharafini 2021 yilning avgustidan 2023 yilning iyuligacha himoya qildi. Bu vaqt ichida argentinalik hujumchi barcha musobaqalarda 75 ta o‘yin o‘tkazib, 32 ta gol urdi va 35 ta golli uzatmani amalga oshirdi. Klub bilan birgalikda u ikki marta Fransiya chempioni va bir bor mamlakat Superkubogini qo‘lga kiritdi.
