Ханс-Дитер Флик «Барселона» билан шартнома муддатини узайтиришга рози бўлди.
Бош мураббий билан тузиладиган янги келишув 2028 йилгача мўлжалланган бўлиб, уни яна бир мавсумга узайтириш имкониятини кўзда тутади. Агар 2027/28 йилги мавсум якунларига кўра ҳар икки томон ҳамкорликни давом эттиришга рози бўлса, қўшимча бир йил автоматик тарзда фаоллашади.
Флик «Барселона» Ла Лига чемпионлигини расмийлаштирганидан сўнг янги шартномага имзо чекади. Ҳозирда жамоа чемпионат тугашига 5 тур қолганда 11 очколик фарқ билан пешқадамлик қилмоқда.
Германиялик мутахассиснинг амалдаги шартномаси 2027 йилда ўз ниҳоясига етиши керак эди. Қайд этилишича, клуб дастлаб Флик билан 2029 йилгача шартнома имзоламоқчи бўлган, бироқ Германия терма жамоасининг собиқ устози ўзи учун қулайроқ бўлган қисқароқ муддатли келишувни маъқул кўрган.
