Xans-Diter Flik «Barselona» bilan shartnoma muddatini uzaytirishga rozi bo‘ldi.
Bosh murabbiy bilan tuziladigan yangi kelishuv 2028 yilgacha mo‘ljallangan bo‘lib, uni yana bir mavsumga uzaytirish imkoniyatini ko‘zda tutadi. Agar 2027/28 yilgi mavsum yakunlariga ko‘ra har ikki tomon hamkorlikni davom ettirishga rozi bo‘lsa, qo‘shimcha bir yil avtomatik tarzda faollashadi.
Flik «Barselona» La Liga chempionligini rasmiylashtirganidan so‘ng yangi shartnomaga imzo chekadi. Hozirda jamoa chempionat tugashiga 5 tur qolganda 11 ochkolik farq bilan peshqadamlik qilmoqda.
Germaniyalik mutaxassisning amaldagi shartnomasi 2027 yilda o‘z nihoyasiga yetishi kerak edi. Qayd etilishicha, klub dastlab Flik bilan 2029 yilgacha shartnoma imzolamoqchi bo‘lgan, biroq Germaniya terma jamoasining sobiq ustozi o‘zi uchun qulayroq bo‘lgan qisqaroq muddatli kelishuvni ma’qul ko‘rgan.
