Якшанба куниёқ «Барселона» муддатидан олдин Испания чемпионига айланиши мумкин. Кеча «кўк-анорранглилар» «Осасуна»ни мағлуб этиб (2:1), деярли муқаррар бўлган чемпионлик сари навбатдаги қадамни ташлашди. Якшанба кунги баҳсда Мадриднинг «Реал» клуби «Эспаньол» билан дуранг ўйнаса ёки имкониятни бой берса, Ханс-Дитер Флик жамоаси титулни қўлга киритади. Бироқ германиялик мураббий рақиб ўйинини томоша қилиш ниятида эмас.
— Эртага «Реал» иштирокидаги ўйинни кўрасизми?
— Йўқ, кўрмайман.
— Сизга ишонмайман.
— Ишонмаслигингиз мумкин, лекин мен «Реал» ўйинини кўрмайман. Бугун биз ўз ишимизни бажардик — мен учун шунинг ўзи кифоя, — деди Флик матбуот анжуманида. Унинг сўзларидан Barca Universal иқтибос келтирмоқда.
«Қаймоқранглилар»нинг «Эспаньол»га қарши баҳси Тошкент вақти билан соат 00:00 да бошланади. Кейинги турда мадридликлар «Камп Ноу»да «Барса» билан ўзаро тўқнаш келишади.
