Yakshanba kuniyoq «Barselona» muddatidan oldin Ispaniya chempioniga aylanishi mumkin. Kecha «ko‘k-anorranglilar» «Osasuna»ni mag‘lub etib (2:1), deyarli muqarrar bo‘lgan chempionlik sari navbatdagi qadamni tashlashdi. Yakshanba kungi bahsda Madridning «Real» klubi «Espanyol» bilan durang o‘ynasa yoki imkoniyatni boy bersa, Xans-Diter Flik jamoasi titulni qo‘lga kiritadi. Biroq germaniyalik murabbiy raqib o‘yinini tomosha qilish niyatida emas.
— Ertaga «Real» ishtirokidagi o‘yinni ko‘rasizmi?
— Yo‘q, ko‘rmayman.
— Sizga ishonmayman.
— Ishonmasligingiz mumkin, lekin men «Real» o‘yinini ko‘rmayman. Bugun biz o‘z ishimizni bajardik — men uchun shuning o‘zi kifoya, — dedi Flik matbuot anjumanida. Uning so‘zlaridan Barca Universal iqtibos keltirmoqda.
«Qaymoqranglilar»ning «Espanyol»ga qarshi bahsi Toshkent vaqti bilan soat 00:00 da boshlanadi. Keyingi turda madridliklar «Kamp Nou»da «Barsa» bilan o‘zaro to‘qnash kelishadi.
