«Тоттенхэм» ярим ҳимоячиси Хави Симонс ўнг тиззасидаги хочсимон боғламлар узилиши туфайли жарроҳлик амалиётини ўтказди.
«Операция муваффақиятли якунланди. Соғайиш жараёнининг ҳар бир босқичида биз сени қўллаб-қувватлаб турамиз, Хави Симонс», — дейилади инглиз клуби матбуот хизмати берган хабарда.
23 ёшли Симонс АПЛнинг 34-тури доирасидаги «Вулверхэмптон»га қарши ўйинда (1:0) олдинги хочсимон боғламларидан жароҳат олган эди. У учрашувнинг 63-дақиқасида алмаштирилиб, майдондан замбилда олиб чиқиб кетилганди.
Бундан аввалроқ нидерландиялик футболчининг ўзи ушбу жароҳат сабаб ЖЧ-2026 мусобақасини ўтказиб юборишини маълум қилган эди.
2025/26 йилги мавсумда Симонс «Тоттенхэм» ва «Лейпциг» сафида жами 43 та ўйинда майдонга тушиб, 6 та гол урди ва 7 та голли узатмани амалга оширди. Нидерландия терма жамоаси сафида эса 34 та ўйинда иштирок этиб, ўз ҳисобига 6 та гол ва 5 та ассист ёздириб қўйган.
