«Tottenxem» yarim himoyachisi Xavi Simons o‘ng tizzasidagi xochsimon bog‘lamlar uzilishi tufayli jarrohlik amaliyotini o‘tkazdi.

«Operasiya muvaffaqiyatli yakunlandi. Sog‘ayish jarayonining har bir bosqichida biz seni qo‘llab-quvvatlab turamiz, Xavi Simons», — deyiladi ingliz klubi matbuot xizmati bergan xabarda.

23 yoshli Simons APLning 34-turi doirasidagi «Vulverxempton»ga qarshi o‘yinda (1:0) oldingi xochsimon bog‘lamlaridan jarohat olgan edi. U uchrashuvning 63-daqiqasida almashtirilib, maydondan zambilda olib chiqib ketilgandi.

Bundan avvalroq niderlandiyalik futbolchining o‘zi ushbu jarohat sabab JCH-2026 musobaqasini o‘tkazib yuborishini ma’lum qilgan edi.

2025/26 yilgi mavsumda Simons «Tottenxem» va «Leypsig» safida jami 43 ta o‘yinda maydonga tushib, 6 ta gol urdi va 7 ta golli uzatmani amalga oshirdi. Niderlandiya terma jamoasi safida esa 34 ta o‘yinda ishtirok etib, o‘z hisobiga 6 ta gol va 5 ta assist yozdirib qo‘ygan.