Миланнинг «Интер» клуби марказий ҳимоячиси Алессандро Бастони «Барселона» билан шартнома имзолашга тайёр. Mundo Deportivo нашрининг хабар беришича, Каталония гранди апрель ойидаёқ италиялик футболчига беш йиллик келишув таклиф қилган ва ўйинчи бунга оғзаки розилик берган.
27 ёшли футболчи фақат «Барса»га ўтишни истамоқда — уни бошқа клублардан келаётган вариантлар қизиқтирмаяпти. Шунга қарамай, «кўк-анорранглилар» ҳалигача «нерадзуррилар» билан трансфер бўйича расмий музокараларни бошлашгани йўқ.
Transfermarkt портали Алессандро Бастонининг бозор қийматини 70 миллион еврога баҳоламоқда, бироқ тахминларга кўра, ушбу келишув «Барселона» учун арзонроққа тушиши мумкин.
