Германия Бундеслигасининг 33-тури доирасида Дортмунднинг «Боруссия» жамоаси ўз майдонида Франкфуртнинг «Айнтрахт» клубини қабул қилди. Голларга бой ўтган баҳс майдон эгаларининг 3:2 ҳисобидаги ғалабаси билан якунланди.

Учрашувда «асаларилар» ҳимоячиси Юлиан Рюэрсон голли узатмани амалга ошириб, ўз ҳисобидаги ассистлар сонини 14 тага етказди. Бу норвегиялик футболчи учун нафақат шахсий рекорд, балки «Боруссия» тарихидаги учинчи кўрсаткич сифатида қайд этилди.

Клуб тарихида статистика юритила бошланганидан бери фақат икки футболчи бир мавсумда Рюэрсондан кўпроқ голли пас берган. Булар — 2019/2020 йилги мавсумда 16 та ассист амалга оширган Жейдон Санчо ҳамда 2015/2016 йилги мавсумда 15 та голли узатмани ўз ҳисобига ёздириб қўйган Генрих Мхитаряндир.

Маълумот учун, «Боруссия Д» мавсумнинг сўнгги турида Бременнинг «Вердер» жамоасига қарши майдонга тушади.