Халқаро футбол ассоциациялари кенгаши (IFAB) бурчак ва жарима зарбалари амалга оширилишидан олдин жарима майдончаси ичида футболчиларнинг бир-бирига қарши курашиши билан боғлиқ қоидаларни ўзгартириш масаласини кўриб чиқиши мумкин. Бу ҳақда The Times нашри хабар бермоқда.

Амалдаги қоидаларга кўра, тўп ўйинга киритилгунга қадар рақиб билан курашиш қоидабузарлик ҳисобланмайди. Шу сабабли кўплаб футболчилар узатма амалга оширилгунга қадар бир-бирини ушлаб қолишга ёки тортишга ҳаракат қилишади.

Баъзи юқори мартабали мулозимларнинг фикрича, бундай курашлар назоратдан чиқиб кетган. АПЛнинг 36-туридан ўрин олган «Вест Хэм» — «Арсенал» (0:1) учрашувида «болғачилар»нинг голи бекор қилингани ушбу масалага эътиборни қаратди: ўша вазиятда ҳар икки жамоанинг бир неча футболчилари рақибларини ушлаб турган ва очиқчасига кураш олиб борган эди.

IFAB бу вазиятни келаси мавсум давомида кўриб чиқиши кутилмоқда.

«Биз буни келаси мавсумда ўрганиб чиқамиз, чунки бу жуда жиддий муаммога айланди. Масала март ойидаги йиғилишимиздан олдин ҳам кўтарилган эди, бироқ уни батафсил ўрганиш учун вақт жуда кам қолганди. Шунинг учун биз бу билан ҳозир шуғулланамиз», — дея IFAB вакилининг сўзларини келтиради The Times.

ESPN ушбу маълумотни тасдиқлади ва муҳокамалар кузда бошланиши мумкинлигини қўшимча қилди.