Мадриднинг «Реал» клуби ҳужумчи Эндрикнинг келажаги борасида бир қарорга келди. Мавсумнинг иккинчи қисмини ижара асосида «Лион»да ўтказаётган бразилиялик иқтидор эгаси яна «қироллик клуби» таркибига қайтади.
Globo нашри хабарига кўра, Эндрик 17 май, якшанба куни Франция жамоаси билан хайрлашади ва Мадридга йўл олади. Клуб раҳбарияти футболчини бу борада расман хабардор қилган.
Ҳужумчининг ўзи олдинда турган Жаҳон чемпионатига муносиб тайёргарлик кўриш мақсадида «қаймоқранглилар»нинг машғулот базасидан фойдаланиш учун рухсат сўраган. Режага кўра, Эндрик 18 май куни оиласи билан Испанияга етиб келади ва 20 майдан бошлаб «Реал» базасида машғулотларни тиклайди.
Маълумот учун, жорий мавсумда Эндрик «Реал» ва «Лион» сафида барча турнирларда жами 23 та учрашувда майдонга тушиб, ўз ҳисобига 8 та гол ва 8 та голли узатмани ёздириб қўйишга муваффақ бўлди.
