«Барселона»нинг чемпионлиги ва «Реал» атрофидаги хабарлар фонида Европа футболида яна бир қизиқарли воқеа содир бўлди. Дания биринчилигида «Орхус» клуби зафар қучиб, мухлисларини хушнуд этди.

Европанинг бошқа мамлакатларида «Копенгаген» ёки «Брондбю» каби машҳур бўлмаган «Орхус» клуби орадан 40 йил ўтиб яна мамлакат тахтига қайтди. Жамоа сўнгги бор узоқ 1986 йилда чемпионлик шоҳсупасига кўтарилган эди.

Ушбу ғалаба «Орхус»га Чемпионлар Лигасининг иккинчи саралаш босқичи йўлланмасини тақдим этди. Тўғри, қитъанинг энг нуфузли турнири асосий босқичига етиб бориш жамоа учун анча мураккаб вазифа бўлиши кутилмоқда.

Маълумот учун, Данияда сўнгги тўрт мавсум давомида чемпионлик бошқа клублар ўртасида тақсимланган эди: уч бор «Копенгаген» ва бир марта «Митьюлланд» олтин медалларни қўлга киритган.