«Barselona»ning chempionligi va «Real» atrofidagi xabarlar fonida Yevropa futbolida yana bir qiziqarli voqea sodir bo‘ldi. Daniya birinchiligida «Orxus» klubi zafar quchib, muxlislarini xushnud etdi.
Yevropaning boshqa mamlakatlarida «Kopengagen» yoki «Brondbyu» kabi mashhur bo‘lmagan «Orxus» klubi oradan 40 yil o‘tib yana mamlakat taxtiga qaytdi. Jamoa so‘nggi bor uzoq 1986 yilda chempionlik shohsupasiga ko‘tarilgan edi.
Ushbu g‘alaba «Orxus»ga Chempionlar Ligasining ikkinchi saralash bosqichi yo‘llanmasini taqdim etdi. To‘g‘ri, qit’aning eng nufuzli turniri asosiy bosqichiga yetib borish jamoa uchun ancha murakkab vazifa bo‘lishi kutilmoqda.
Ma’lumot uchun, Daniyada so‘nggi to‘rt mavsum davomida chempionlik boshqa klublar o‘rtasida taqsimlangan edi: uch bor «Kopengagen» va bir marta «Mityulland» oltin medallarni qo‘lga kiritgan.
