«Барселона» «Манчестер Сити» ҳужумчиси Омар Мармуш трансфери учун курашда етакчи бўлиб турибди. Бу ҳақда Caught Offside хабар бермоқда.

Манбага кўра, мисрлик футболчи «шаҳарликлар» сафини тарк этишга шошилмаяпти, бироқ у кўпроқ ўйин амалиётига эга бўлишни истайди.

«Манчестер Сити» эса 27 ёшли форвардни 60–65 миллион евро атрофидаги таклиф бўлса, сотишга тайёр.

Каталонияликлар Мармушни Роберт Левандовский ўрнини босиши мумкин бўлган номзод сифатида кўрмоқда. Польша терма жамоаси ҳужумчиси ёзда жамоани тарк этиши кутилмоқда.

Жорий мавсумда Мармуш барча мусобақаларда 34 та учрашувда иштирок этиб, 8 та гол ва 3 та голли узатмага муаллифлик қилди. Унинг «Манчестер Сити» билан шартномаси 2029 йил ёзига қадар амал қилади. Transfermarkt маълумотига кўра, футболчининг бозор қиймати 60 миллион еврога баҳоланмоқда.