«Барселона» ярим ҳимоячиси Фермин Лопес Мадриднинг «Реал» клуби раҳбари Флорентино Переснинг шов-шувли баёноти ҳақида ўз фикрларини билдирди. Яқинда бўлиб ўтган матбуот анжуманида «қаймоқранглилар» президенти унинг клубидан Ла Лиганинг еттита титули «ўғирланганини» очиқчасига даъво қилган эди.
«Биз унинг сўзларини эшитдик, лекин бунинг иложи йўқ. Ҳозир ишларимиз жойида, шунинг учун янги совринлар ҳам узоқда эмас деб ўйлайман. Сиз ютқазганингизда ғазабланишингиз табиий, аммо «Реал» буни шунчаки қабул қилиши керак. Улар ғалаба қозонишганида, биз ҳам мағлубиятни тан оламиз», — дея Ферминнинг сўзларини келтирмоқда Que T'hi Jugues.
Эслатиб ўтамиз, 11 май куни «кўк-анорранглилар» «Эл-Класико»да «Реал»ни 2:0 ҳисобида мағлуб этиб, муддатидан олдин кетма-кет иккинчи бор Ла Лига чемпионлигини қўлга киритган эди.
