«Ан-Наср» ҳужумчиси Жоау Феликс қўлга киритилган чемпионликдан сўнг журналистлар билан суҳбатлашди.

26 ёшли футболчи Ар-Риёд жамоасининг сўнгги турда «Дамак» устидан қозонган ғалабасига (4:1) битта голли узатма амалга оширган ҳолда ўз ҳиссасини қўшди. Ушбу ғалабадан кейин «Ан-Наср» ўз яқин таъқибчиси «Ал-Ҳилол»ни икки очкога ортда қолдириб, чемпионлик унвонини расмийлаштирди.

Учрашув якунланганидан сўнг, журналистлар Феликсдан мавсумнинг энг яхши футболчиси совринига ким лойиқлиги ҳақида сўрашди.

«Бу мавсумда кўплаб футболчилар ўзларини кўрсата олишди, бироқ менимча, бу соврин бизнинг жамоа аъзоларидан бирига берилиши керак, чунки биз чемпион бўлдик. Мен энг асосий номзодлар сифатида ўзимни ва Криштиануни кўрсатган бўлардим», — дея «Al Nassr Zone» Феликснинг сўзларидан иқтибос келтирмоқда.

Маълумот ўрнида, Криштиану Роналду 28 та гол билан чемпионат тўпурарлари пойгасида учинчи ўринни эгаллади. Жоау Феликс эса 20 та гол билан тўпурарлар рўйхатида бешинчи бўлди, шунингдек, 13 та голли узатма билан мавсумнинг энг яхши ассистентига айланди.