"Миннесота Юнайтед" ва Колумбия миллий терма жамоаси ярим ҳимоячиси Хамес Родригес Мадриднинг «Реал» клубида Зинедин Зидан қўл остидаги фаолияти ҳақида фикр билдирди.
— Зидан даврида мен машғулотларда жуда яхши ишлардим. Ўйинларда ҳам барчасини тўғри бажарардим, икки томонлама ўйинларда қатнашардим, голлар урдим ва голли узатмалар бердим. Аммо муҳим учрашувларда майдонга тушиш вақти келганда, асосий таркибдан четда қолардим. Шунда асабийлаша бошлардим ва ўзимга: «Яна нима қилишим керак?» деган саволни берардим.
Газеталар менинг захира ўриндиғида жаҳл билан ўтирган пайтдаги нигоҳим ҳақида танқидларга тўла эди. Бу эса заҳарли муҳитни юзага келтирди. Менимча, мураббийда бошиданоқ 12 ёки 13 нафар доимий асосий таркиб ўйинчилари бор эди ва шу базага таянарди. Бироқ менда Зидан билан ҳеч қачон шахсий муаммо бўлмаган. Мен фақат ўйнашни хоҳлардим. У жуда кўп совринларни қўлга киритгани учун ҳурматга лойиқ, — деди Родригес Marca нашрига берган интервьюсида.













