Канада терма жамоаси ҳимоячиси Альфонсо Дэвис 2026 йилги Жаҳон чемпионатида иштирок этади, бироқ биринчи учрашувни ўтказиб юбориши мумкин. Бу ҳақда канадаликлар бош мураббийи Жесси Марш маълум қилди.

Унинг сўзларига кўра, Дэвис биринчи ўйингача тўлиқ тайёр бўлиши эҳтимоли паст.

Футболчи «ПСЖ»га қарши Чемпионлар Лигаси учрашувида жароҳат олган. Тиббий текширувлар натижасига кўра, 25 ёшли ҳимоячининг чап сон орқа мушаги шикастлангани аниқланган.

Маршнинг айтишича, «Бавария» футболчини Германияда амалга ошириладиган замонавий даволаш усуллари орқали тикламоқда. Бу усуллар эса Шимолий Америкада мавжуд эмас. Шу сабабли у Германияда қолган. Клуб ҳам унинг Жаҳон чемпионатига тайёр бўлиб чиқишини истамоқда.

Шу сабабли, Дэвис 1 июнь куни бўлиб ўтадиган Канада ва Ўзбекистон миллий жамоалари ўртасидаги ўртоқлик ўйинида ҳам иштирок этмайди.

Жорий мавсумда Дэвис 23 та ўйин ўтказиб, 1 та гол ва 5 та голли узатмани амалга оширган.

Жаҳон чемпионати 2026 йил 11 июндан 19 июлгача АҚШ, Канада ва Мексикада бўлиб ўтади. Канада гуруҳ босқичида Босния ва Герцеговина, Қатар ва Швейцарияга қарши ўйнайди.