Англиянинг «Кристал Пэлас» ва Испаниянинг «Райо Вальекано» жамоалари ўртасидаги Конференциялар лигасининг 2025/26 йилги мавсум финал учрашуви якунланди. Ўйин Лейпциг шаҳридаги «Лейпциг» стадионида бўлиб ўтди. Учрашувни бош ҳакам сифатида Маурицио Мариани бошқариб борди. Ўйин Лондон клубининг 1:0 ҳисобидаги ғалабаси билан якунланди.

Учрашувдаги ягона голни Жан-Филипп Матета киритди. «Кристал Пэлас»нинг француз ҳужумчиси иккинчи бўлим бошида, 51-дақиқада гол урди.

Шу тариқа, «Кристал Пэлас» ўз тарихида илк бор еврокубок турнирида ғолиб чиқди.

«Кристал Пэлас» турнирнинг 1/2 финал босқичида Украинанинг «Шахтёр» жамоаси устидан иккита ғалабага эришган эди (3:1, 2:1). «Райо Вальекано» эса ярим финалда Франциянинг «Страсбург» клубини мағлуб этиб (1:0, 1:0), аҳамияти бўйича учинчи ўринда турувчи еврокубок финалига йўл олганди.