Angliyaning «Kristal Pelas» va Ispaniyaning «Rayo Valyekano» jamoalari o‘rtasidagi Konferensiyalar ligasining 2025/26 yilgi mavsum final uchrashuvi yakunlandi. O‘yin Leypsig shahridagi «Leypsig» stadionida bo‘lib o‘tdi. Uchrashuvni bosh hakam sifatida Maurisio Mariani boshqarib bordi. O‘yin London klubining 1:0 hisobidagi g‘alabasi bilan yakunlandi.

Uchrashuvdagi yagona golni Jan-Filipp Mateta kiritdi. «Kristal Pelas»ning fransuz hujumchisi ikkinchi bo‘lim boshida, 51-daqiqada gol urdi.

Shu tariqa, «Kristal Pelas» o‘z tarixida ilk bor yevrokubok turnirida g‘olib chiqdi.

«Kristal Pelas» turnirning 1/2 final bosqichida Ukrainaning «Shaxtyor» jamoasi ustidan ikkita g‘alabaga erishgan edi (3:1, 2:1). «Rayo Valyekano» esa yarim finalda Fransiyaning «Strasburg» klubini mag‘lub etib (1:0, 1:0), ahamiyati bo‘yicha uchinchi o‘rinda turuvchi yevrokubok finaliga yo‘l olgandi.