Шанба куни Чемпионлар лигасининг финали бўлиб ўтди, унда «ПСЖ» пенальтилар сериясида «Арсенал»ни мағлуб этди. WhoScored машҳур статистик портали версиясига кўра, ҳал қилувчи баҳснинг энг яхши футболчиси 7,6 балл олган Дезире Дуэ деб топилди.

Мусобақанинг умумий натижаларига кўра эса, энг юқори ўртача баллга Мадриднинг «Реал» клуби аъзоси Килиан Мбаппе сазовор бўлди (8,12). У, шунингдек, 15 та гол билан тўпурарлар пойгасида ҳам ғолиб чиқди. Рейтингда иккинчи ўринни «Бавария»дан Гарри Кейн (8,08) эгаллаган бўлса, кучли учликни «Барселона»дан Ламин Ямаль (8,04) якунлаб берди.

Кучли бешликка, шунингдек, Майкл Олисе («Бавария», 7,91) ва Хвича Кварацхелия («ПСЖ», 7,77) киритилди.